Widgetized Section

Go to Admin » Appearance » Widgets » and move Gabfire Widget: Social into that MastheadOverlay zone

ከጨረቃ ጋራ

 

ፍቅሬ ቶሎሳ

አይበርድም አይሞቅም፥
ደስ ይላል ዐየሩ፥
ገላዬን ተስማማው፥
ብርዱ በነፋሻው አሁን መቀየሩ።

እራመዳለሁኝ ብቻዬን በመስኩ፥
ሆቴሉ ሳልገባ ላየሩ ሰስቼ፥
እንዲደባብሰኝ፥ ጃኬቴን አውልቄ፥
ጨረቃ ወዳጄን ደሞ እጅ ነስቼ።

በሄድኩበት ሁሉ፥
እንደ’ናቴ መንፈስ ትከተለኛለች፥
ቁልቁል እያየችኝ፥
እንኳን ደህና መጣህ ባልንጀር እያለች።

ፀሀይዋ ሳታያት፥
ጥቂት ፀዳል ሰርቃ፥
ታበራልኛለች፥
አብሮ-አደግ ጨረቃ።

የድሮኮ እውቄ ነህ፥
ትለኛለች እኔን “በሰው ወርቅ ደምቃ”፣
አይታወቅ መስሏት፥
ምስጢሯን አምቃ።

በርግጥ ወዳጄ ናት፥
በህጻንነቴ በማለዳ በጥንት፥
አውቃት የነበረች፥
ስጋዬ ሳይዳብር፥ ሳይጠና የኔ አጥንት።

ማን አለኝ እንደ ‘ሷ በዳላስ ከተማ፥
የሚያውቀኝ ከድሮ፥
ከድሬደዋዬ፥ ከያኔ ጀምሮ፥
ፍቅራችን የሚያሸት ውሎ እና አድሮ?

የሰው ጓደኛማ
ይሄዳል ይመጣል፥
በወረት አንስቶ፥
በወረት ለመጣል።

አንች ሁሌ አትክጂኝም፥
ወዳለም ዳርቻ ወዳጽናፋት ብርቅ፥
ትከተይኛለሽ አይዞህ አትፍራ እያልሽ፥
በግሩማን ሌሊት በማለት ብርቅርቅ ፤
ማን አለኝ ጓደኛ
እንደ አንቺ ታማኝ፥ እንዳንች የሆነ ብርቅ?
እንዳንቺ ሽቅርቅር፣
እንደ አንቺ ሽብርቅ?

ግና ተለይቼሽ ይችን ዐለም ስለቅ፥
ከበላይዋ እንዳልዋልኩ ሳድር ከምድር በታች፥
ትረሺኝ ይሆን ወይ፥
እኔ ከአፈር ውስ ጥ ግን ስሆን ተከታች?

አውቃለሁ ወዳጄ አትረሽኝም ያኔም፥
ከቀብሮች መሀል መቃብሬን ዳስሰሽ፥
ታጻድይዋለሽ፥
የብርሀን ጋቢሽን ሳትሰስች አልብሰሽ።

ደሞም ትይኛለሽ ፍቅሬዋ እሽሩሩ፥ እሽሩሩሩሩ…
እሽሩሩሩሩ ተኛ እኔ እስክል ድርግም፥
ከሞት እስክትነቃ፥
የፈጠረህ ዐምላክ እኪከመጣ ዳግም።

ከጨረቃ ጋራ በዳላስ ከተማ

02 05 2017
ዳላስ፣ ቴክሳስ