Widgetized Section

Go to Admin » Appearance » Widgets » and move Gabfire Widget: Social into that MastheadOverlay zone

የግልገል ጊቤ ሁለት ኃይል ማመንጫ 14 ሠራተኞች በተሽከርካሪ አደጋ ሕይወታቸው አለፈ

Image result for gilgel gibe

የግልገል ጊቤ ሁለት የኤሌክትሪክ ኃይል ማመንጫ ግድብ የኦፕሬሽን ሠራተኞች ሚኒባስ ሰርቪስ ዓርብ ሐምሌ 21 ቀን 2009 ዓ.ም. በደረሰበት የመገልበጥ አደጋ፣ 14 ሠራተኞች ሕይወታቸው ሲያልፍ አሥር ሠራተኞች ደግሞ ጉዳት ደርሶባቸው በሕክምና ላይ ይገኛሉ፡፡

በኦሮሚያ ክልል ጅማ ዞን ውስጥ የሚገኘው የግልገል ጊቤ ሁለት የኃይል ማመንጫ ግድብ የቴክኒክ ሠራተኞችን ከካምፓቸው ወደ ግድቡ ሲያጓጉዝ የነበረው ሚኒባስ፣ ባጋጠመው ድንገተኛ አደጋ ጥልቅ ጉድጓድ ውስጥ መገልበጡን የኢትዮጵያ ኤሌክትሪክ ኃይል የኦፕሬሽን ዘርፍ ምክትል ዋና ሥራ አስፈጻሚ አቶ አንዳርጌ እሸቴ ለሪፖርተር ገልጸዋል፡፡

በአደጋው ወቅት በአካባቢው ጥበቃ ላይ የነበሩ የፌዴራል ፖሊስ አባላት ባደረጉት ርብርብ፣ ጉዳት የደረሰባቸው የግድቡ ሠራተኞች በገመድ እየተጎተቱ መውጣታቸውን አቶ አንዳርጌ አስረድተዋል፡፡ ተጎጂዎቹ ደቡብ ክልል ጉራጌ ዞን አጣጥ ሆስፒታል የመጀመሪያ የሕክምና ዕርዳታ ካገኙ በኋላ፣ በአገር መከላከያ ሚኒስቴር ሔሊኮፕተር ወደ አዲስ አበባ ተጓጉዘው በደጃዝማች ባልቻ ሆስፒታል በሕክምና ላይ እንደሚገኙ ምክትል ዋና ሥራ አስፈጻሚው ገልጸዋል፡፡

የ14 ሟቾች አስከሬን ዮሐንስ ቤተ ክርስቲያን አካባቢ በሚገኘው የቅዱስ ጳውሎስ ሚሊኒየም ሆስፒታል ቅርንጫፍ ቅዳሜ ሐምሌ 22 ቀን 2009 ዓ.ም. ምርመራ እየተካሄደለት እንደነበር አቶ አንዳርጌ አስረድተዋል፡፡ ‹‹የኢትዮጵያ ኤሌክትሪክ ኃይል በሠራተኞቹ ላይ በደረሰው አደጋ በጣም ድንጋጤ ውስጥ ገብቷል፡፡ ከዚህ ዓለም በሞት ለተለዩት የሥራ ባልደረቦቻችን ቤተሰቦች መፅናናትን እንመኛለን፤›› ሲሉ አቶ አንዳርጌ ገልጸው፣ በሕክምና ላይ የሚገኙትን ሠራተኞች ሕይወት ለማትረፍ ርብርብ እየተደረገ መሆኑን አክለዋል፡፡

የግልገል ጊቤ ሁለት ኃይል ማመንጫ መጋቢት 11 ቀን 1997 ዓ.ም. ግንባታው ተጀምሮ የተጠናቀቀው ጥር 6 ቀን 2002 ዓ.ም. ሲሆን፣ 420 ሜጋ ዋት የኤሌክትሪክ ኃይል ያመነጫል፡፡ ግንባታውን ያከናወነው የጣሊያኑ ሳሊኒ ኮንስትራክሽን ኩባንያ ነው፡፡

ሪፖርተር

Posted by on July 31, 2017. Filed under አማርኛ/Amharic. You can follow any responses to this entry through the RSS 2.0. Both comments and pings are currently closed.